Michael Jackson Neverland Ranch chei thar

King of pop, Michael Jackson chenna ṭhin leh theme park lar tak ṭhin, Neverland Ranch chu a biopic 'Michael' an siamna tur atan chei thar leh mek a ni.

He ranch hi California-a Santa Barbara bula awm a ni a, a hmaa a ropui leh mawina anga lang leh thei turin chei thar leh mek a ni a, ferris wheel leh hot-air balloon ride-te pawh dah a ni tawh. Kum 2003-a naupang khuaikhema puh chungchanga police-te'n an dap hnuah Jackson hian a ranch hi chhuahsanin a ngaihsak zui lo a, kum 2020 khan billionaire Ron Burke chuan USD mtd 22-in a lei zui a ni. Michael Jackson biopic siam tur, 'Michael' -ah hian MJ lemah a u fapa, Jaafar Jackson a chang dawn a ni. He film-ah hian Jackson 5 lead singer a nih aṭanga khawvel huapa a lar chhuah a, King of Pop tih hial a nih chhoh chanchin tarlan tum a ni a, hei bakah naupang khuaikhem nia puh chungchang leh buaina hrang hrang a neihte pawh pholan tum a ni bawk. Nakkum April thlaa tihchhuah tum niin, film ngaihven hlawh ber tur zingah a tel ngei rin a ni.