Billboard 200 : Future leh Metro Boomin-te rawn lang thar leh

Billboard 200 album chart-ah Future leh Metro Boomin chuan an thawh dunna album thar, ''We Still Don't Trust You' chu no. 1-ah an rawn lanpui leh.

'Turn On the Lights' rapper leh 'Mr. Right Now' spitter-te hian no. 1 an lo nihpui tawh, 'We Don't Trust You' album an tihchhuah aṭanga kar thum hnu lekah 'We Still Don't Trust You' hi an tichhuak a, no. 1-ah rawn lanpui nghalin, kar liam ta chhung khan US-ah equivalent album unit 127,500 an nei. He album-ah hla 25-te hian on-demand official stream mtd 162.57 hu an nei a, album sales hi 2,500 a ni bawk.

No. 2-ah Beyonce Knowles country album, 'Cowboy Carter' a tla thla thung a, equivalent album unit 98,000 neiin, Future leh Metro-te album hmasa, 'We Don't Trust You' chu no. 3-ah a la lang zui bawk a ni. Morgan Wallen-a'n hun rei tak chhung no. 1 dinhmun a lo hauhpui tawh, 'One Thing at a Time' chu no. 5 aṭangin no. 4-ah a rawn chho leh, Noah Kahan 'Stick Season' pawh no. 8 aṭangin no. 5-ah a rawn inhlangkai bawk a ni.

Linkin Park hits compilation album hmasa ber, 'Papercuts' chu no. 6-ah a rawn lang a, anni bakah Top 10-ah hian Benson Boone full-length studio album hmasa ber, 'Fireworks & Rollerblades', SZA 'SOS', Morgan Wallen 'Dangerous : The Double Album' leh Ariana Grande 'Eternal Sunshine' te an lang.