Miss Mizoram 2024: Sub-title night hman a ni

Miss Mizoram 2024 thlanna neih mekah, April 23, 2024 (Thawhlehni) zan khan Saizahawla arcade, Tanhrila city sky hall-ah Sub-title night hman a ni a, category paruk - Miss Personality, Miss Talented, Miss Active, Miss Body Beautiful, Miss Photogenic leh Miss Rampwalk winner-te puan an ni.

Thawhlehni zana Sub-title night hman hi Mizoin show host kan neih ṭhat ber zinga mi, Rini Hlondo chuan a host a ni.

Evelyn Zachhingpuii chu sub-title pahnih - Miss Personality leh Miss Body Beautiful winner niin, Jennifer Lalrinzuali pawhin Miss Photogenic leh Miss Rampwalk lawmman a la bawk. Miss Talented-ah M.Lalrinchhani thlan niin, Miss Active-ah Judith Lalramengmawii thlan a ni bawk. Sub-title winner hian lawmmanah Rs. 10,000 ṭheuh an dawng a ni.

Miss Mizoram 2024 thlanna hi a hmawr bawk a ni dawn hnai tawh a, Grand Finale hi April 26, 2024 (Zirtawpni) zan hian neih a ni dawn a, Zonet Zawlbuk leh Zonet Empai App-ah pek chhuah a ni ang. Hemi zan hian sub-title dang - Beauty with a purpose, Miss Beautiful Skin, People's Choice leh Miss Congeniality winner-te puan an ni hmasa dawn a, People's Choice atana thlan hian Top 10 a thleng nghal dawn a ni. Top 10 aṭangin Top 5 thlan chhuah leh a ni ang a, Top 5 aṭang hian Miss Mizoram 2024, 1st runner up leh 2nd runner up thlan an ni ang.