AI voice hman vangin Drake-a'n sawi a hlawh

Canadian rapper, Drake chuan Kendrick Lamar diss track a tihchhuah tharah, rap legend Tupac Shakur leh Snoop Dog-te AI voice a hman tel avangin sawisel a tawk nasa a, hei bakah art-a AI hman chungchang pawhin sawi zui a hlawh phah hle.

He diss track 'Taylor Made Freestyle' hi 'Push Ups' sequel a ni a, 2Pac AI voice a hmang hi Tupac-a unaupa, Mopreme Shakur pawh a lawm lo hle a, a tel ve loh buaina chungchanga a unaupa aw hman tel a ni chu a dem thu a sawi. Critics lam pawhin Drake thiltih dan hi ṭha an tih loh thu sawiin, music lama AI hmanin nghawng ṭha lo a neih theih dante sawiin, ṭhangthar zawkte chuan computer-generated verse chu 2Pac aw tak tak emaw an tih phahte a hlauhawm tih an sawi.