Spotify-in premium subscriber mtd 144 nei tling tawh

Music streaming platform Spotify chu an ṭhang nasa hle a, Wall Street-in a lo rinlawk aia nasa fein subscriber an ngah chak a, tunah chuan khawvel ram hrang hrang aṭangin premium subscriber maktaduai 144 chuang an nei der tawh.

Ningani khan hemi chungchang hi Spotify chuan tarlangin an elipui ber Apple Music aiin a let dawnin subscriber hi an ngah tawh zawk a, kumin chhung hian khawvel ram hrang hrangah subscriber an ngah zual hle a, Middle East leh India rama an market an zauh nasat hnuah an ngah chak lehzual niin a lang.

An sum hmuhna ber, premium subscriber pawh  nikum lam aiin 27%-in an ngah tawh zawkin premium subscriber ringawt pawh mtd 144 an nei tling der tawh. Zirmite chuan tun ang hun velah hi chuan mtd 142.5 vel an neih hman an rin chauh laiin maktaduai chuang fein hei hi an khum ta a ni. Premium kher lo spotify hmangtu hrim hrim phei chu an pung nasa tawk hle a, nikum lam aiin 29% laia pungin tunah hian user maktaduai 320 vel lai an nei.

Russia-a market thar an hawn avangin subscriber hi an nei ngah chak niin Spotify chuan an sawi a, Russia-a an market thar hawn chu 'most successful new market launch' tiin an sawi hial.

Spotify premium subscri­ber-te hian man chawi lo te ang lo takin advertisement tel loin hla an ngaithla thei a, hripui len vanga mi tam tam an inkhung avangin subscriber hi nasa takin an pung nia ngaih a ni bawk.

Hetihlai hian zirmite beisei aiin revenue erawh a pung chak lo thung a, tun quarter an hman mekah hian 14%-in an revenue chu pungin EUR tld 1.98 vel an hmu chhuak a, analyst lam chuan EUR tld 2 an hmuh chhuah hman an beiseipui a ni.