WhatsApp-in internet tel loa thlalak thawn theihna feature enchhin

Platform hrang hranga instant messenger app. hman lar ber, active user tluklehdingawn 2.78 chuang nei mek, WhatsApp chuan internet connection ngai kher loa file leh thlalak inthawn theihna tur feature a enchhin leh mek.

Messaging app. dang, Telegram, Signal leh a dang dang rawn lar chho ve mek karah, WhatsApp hian hma hruaitu a nihna tihngheh chhunzawm zelna turin a khat tawkin feature thar a siam belh reng a ni.

User-te hip beh zelna tura feature thar a enchhin hi Android beta version-ah a ni a, internet connection ngai loin, 'People nearby' a tih hmangin thlalak leh file-te hi a in-share theih dawn a ni. Hei hi user zawng zawng tana hman theih a nih hunah chuan, hmun khata awm, ṭhian leh chhungkhatte tan pawh data hmang loin thlalak leh video a inthawn chur chur theih dawn a, data bill pawh a ziaawm phah hle ang. Hei bakah iPhone leh Android mobile-te file share buaithlak deuhah pawh, WhatsApp 'People nearby' feature hi a ṭangkai chho hle ang.

WhatsApp chuan an feature thar hi hun eng emaw chen enchhin chhunzawm phawt a la tum a, beta tester-te aṭangin feedback a la mek a ni. Feedback an dawn dan azirin, an rawn hmang tlang maithei a, mahse, felfai tawk lohna awmte pawh siam ṭha a, chumi hnuah a nawlpui tana chhawpchhuah chauh an tum.

He feature thar bakah hian WhatsApp chuan an app katlangin phone number save kher ngai loa call theihna tur, in-app dialer feature siam a tum bawk.