Body-shaming vangin Jelly Roll-a'n Instagram a chawlhsan

Social media hian ṭangkaina tam tak a neih rualin, a hmang thiam lote erawh chuan midang hmuhsit leh deuhsawhna, mi natna thlentu atan an hmang fo. Hetiang tuartu zingah hian mi lar takte pawh an awm ṭhin. American singer leh rapper Jelly Roll pawh a pianphung chungchangah social media lamah deuhsawhna a tawh nasat avangin Instagram a chawlhsan.

Hemi chungchang hi a nupui, Bunnie Xo chuan sawiin, 'Ka pasal chu a pianphung avanga deuhsawhna a tawh nasat avangin social media lam pawh a chawlhsan a ni. Mi fel tak a nih avangin hei hian ka rilru a tinain ka lung a tichhe hle," a ti. Kum 39 mi, Roll hian a Instagram-a post hnuhnung ber chu April 9 kha a ni a, mahse, deuhsawhna a tawh nasat em avangin hemi hnu hian a Instagram pawh hi a khawih zui ta lo. Bunnie chuan a pasal chunga thil thleng aṭang hian, mi tinte chu social media lama thil an sawi dawnin inngaihtuah nawn leh ṭhin se a duh thu a sawi a, 'Mi dang tinawmnahin deusawh ngawt lo la, an rilru lam dinhmun engmah i hriatpui si lo, " a ti.