Khiangte Construction Ṭhazual Gospel-ah 'Beautiful Day' a rawn lang

Champhai Vengthlang nula Laldinsangi chuan 'Beautiful day (Mizo Version)' chu Khiangte Construction Ṭhazual Gospel chart tharah pakhatna a rawn nihpui ta.

'Beautiful Day' hi Jermaine Edwards, Rushawn leh TRINIX hla niin, Mizo ṭawnga lettu hi Zorinsangi a ni. Dinsangi hian Ngopaa KṬP General Conference neih takah khan mawi takin a rawn sa a, a zaithiamin a che vel a hmuhnawm bawk a, a hit-pui hle. March 30, 2024 khan a music video hi YouTube lamah dah chhuakin, ngaithlatu pawh an pung chak hle. Videographer hi John Jahau niin, video editor Tetea Ralte a ni a, Jerome Hauzel produce a ni. Ṭhazual chart-ah pawh lanpui nghalin, hma a rawn sawn zel a, rin lawk ang ngeiin pakhatna a rawn ni ta a ni.

Lalthansangi pawhin hma sawn zelin, 'Chhandamtu'n min ko' tih chu no. 2-ah a rawn chho. He hla hi Lalrindika phuah a ni a, March 16 khan music video hi a tichhuak a ni. No. 3-ah Sanga Renthlei 'Hmangaih Lalpa' awmin, Mawimawii 'Tuarna zara malsawmna' leh Lalmuansangi 'Ka chawl ve ang' tihte chu no. 4 leh no. 5-ah an awm.

Ṭhazual Gospel chart tharah hian Jenny Colney, Lalhmudiki leh Priscilla Laldinpuii Fanai-te an la lang chhunzawm zel a, anni bakah One in Christ leh Vohbik chuan an hla tharte an rawn lanpui bawk a ni.