Billboard chart-ah Taylor Swift a ropui

Rin lawk ang ngeiin Taylor Swift album thar, "The Tortured Poets Department" chu Billboard chart lamah a rawn che bon hle. Billboard 200 album chart-ah no. 1 rawn ni nghalin, Swift hian kum 70 dawn chhunga soloist zinga no. 1 ni thei album nei ngah ber, rapper Jay-Z a rawn nih rual ta. Swift hian no. 1 ni thei album 14 a nei ta a ni.

Kum 34 mi, Swift hian Billboard 200 album chart-ah no. 1 dinhmun a hauh bakah, Billboard Hot 100 chart-ah Top 10 chu "The Tortured Poets Department" a a hlate hian an luah fai vek bawk. Top 10 chauh ni loin, Top 11-14 thleng pawh Taylor Swift hla vek an la ni bawk a ni. Kum 2022 khan Swift hian 'Midnights' album hmangin Hot 100 chart Top 10 luah vek thei record a lo siam tawh a ni. Taylor Swift pawh a album thar hlawhtlinna avangin a lawm hle a, a Instagram kaltlangin Swifties-te chu lawmthu a hrilh a ni.

April 19-a tlangzarh,'The Tortured Poets Deparment' hian a kar khatnaah US-ah equivalent album unit mtd 2.61 zet a rawn nei a, he album-a hla 31-te hian on-demand official stream mtd 891.37 an nei bawk. Traditional album sale pawh mtd 1.914 a tling pha.

No. 2-ah Future leh Metro Booming thawh dunna, 'We Don't Trust You' a la lang a, Beyonce 'Cowboy Carter' chu no. 3-a a tla thla thung. Morgan Wallen chuan 'One Thing at Time' chu no. 4-ah a lanpui thei zel a, Pearl Jam 'Dark Matter' pawh Top 5-ah a lang ve bawk.