Lara Dutta-i'n 'Ramayana'-a chan a châk

Nitesh Tiwari film thar tur, ngaihven hlawh tak 'Ramayana'-ah Lara Dutta a chang ve dawn nia sawi thawm a awm a, Larra Dutta pawhin he thu thang hi a lo hriat ve thu leh, he film-a character eng emaw zat chu a chan chak zawng tak an nih thu a sawi zui.

'Ramayana'-ah hian Lord Ram lemah Ranbir Kapoor leh Sita lemah Sai Pallavi te chang turin tihfel a ni tawh a, mahse, cast dang turte erawh puan an la ni lo. Lara Dutta chuan, 'Thu thang hrang hrangte ka lo hre ve a, tu nge 'Ramayana'-ah chang duh lo awm ang? Character ka chan chak zawng eng emaw zat an awm a, min sawm ni se chuan ka chang ngei ang,' a ti. Mahse a film siamtu lam hian engmah sawi an la nei lo thung. Ranbir Kapoor pawh a role play tur atan a inbuatsaih nasa tawh hle a, diet khauh tak nen, body weight training pawh a nei nasa tawh hle.