Lersia Play-ah 'Dâk Pu' a hit

April thlaa Mizo film chhuak, Lersia Play aṭanga pek chhuah zingah 'Dâk Pu' a hit ber.

'Dâk Pu' hi thla tawp lam, April 26-ah release chauh ni mah se, April thla chhunga entu ngah ber dinhmun a rawn hauh thei nghal a ni. Amawii Hero sponsor niin, director hi V. Zochhuanmawia a ni a, Chiangtea Videography kutchhuak a ni. Script pawh hi Chiangtea ziah a ni a, screenplay Nuna Hrahsel leh, background score hi Ben Opa siam niin, VFX hi Vtech Entertainment an ni. He film-ah hian Mizo lemchan thiam kan neih ṭhat zinga mi - Alexa, Adama, Hruaia Sailo, Ms-i, Sangtei Renza, Maruata Rawite leh Joe te an chang.

April thla chhunga film hralh chhuah hnem ber dawttu chu April 19-a tlangzarh, 'Tualsumsu' a ni. Zote Entertainment kutchhuak, horror/thriller movie hi continuous shot (cut awm lo)-a siam niin, director leh producer hi Mike a ni a, a changtute hi Mesty Tochhawng, Lucas Tlau, Aron Hrangchal, Claudya Hmingsangzuali leh Remremi te an ni.

March thlaa film hralh chhuah hnem ber, 'Thih leh Dam' chu April thlaah pathumnaah a la lang thei. February 23, 2024-a tlangzarh niin, director leh script writer hi B. Lalbiakvela a ni. Gilbert Colney leh Msi Chhangte changin, anni bakah Papuia Pachuau, Lalawma leh Laltleipuii Punte te an chang bawk.

Lersia Play kaltlanga April thla chhunga film hralh chhuah hnem zual Top 5-ah hian 'Rini leh Rina' bakah 'Two Wheeler Taxi Driver' te an la lang bawk a ni.