Zaninah 'Keimah thingtlang nula' en theih dawn

Osiama Pictures Production chuan YouTube lama thawnthu lar, lawm leh ngaihven hlawh tak, Angel Pops ziah 'Keimah thingtlang nula' tih chu film puitlinga siamin, zaninah mipuite en theih turin an rawn chhawp chhuak dawn ta.

'Keimah thingtlang nula' hi Royte Business produce a ni a, director J.S.Tharmawia hi 'Kherawlai' film lo direct tawhtu kha a ni. Director of photography (D.O.P) hi Production hming chawitu, C. Lalliansiama (Osiama Pictures) niin, Mizoram film industry-ah sulhnu a nei nual tawh a, 'Kherawlai', 'Ramri' leh 'Friends from mini hotel' ah pawh D.O.P a lo ni tawh a ni.

A changtute zingah hian Mizote'n lemchan lama kan hmelhriat sa, film lama sulhnu lo nei nual tawhte an tel nuk a ni. He film-ah hian comedy, romance leh suspense thriller kan hmu dawn a, thingtlang khaw pakhata thil thleng hlimawm leh lungchhiatthlak tak kara ṭhian inhmangaihna leh duhamna inbuk tawnna lamte a ni dawn.

Zanina Vanapa Hall-a 'Keimah thingtlang nula' tlangzarhnaah hian a hmuna en duh tan ticket Rs 150-in lei tur a awm dawn. Lersia Play-ah zanin vek hian en theih tura chhawp chhuah a ni bawk ang.