Darbu-ah K.Hminga bawk a langsar leh

April thla chhungin Darbu Music App-ah K. Hminga bawk a langsar leh a, a album 'Ka Ngaih, Zawng ho' chu hralh chhuah tam ber niin, he app kaltlanga hla play hnem ber pawh K.Hming hla bawk a ni.

Darbu App lamah hla dah thar langsar a tam lo a, hei vang hian hla hralh chhuah leh play tam zual ho pawh March thla nen a danglam nasa lo. Rinfeli Khiangte single thar, 'Duh Te'n Ka chawi' chu April thlaa hla hralh chhuah tam ber dawttu niin, pathumnaah Matilda & The Quest album, 'Damdiai' a awm. The Leprosy Mission Choir leh One in Christ-te soundtrack chu zaipawl leh group-te tan a ṭangkai hle a, No 4 leh No 5-ah an la lang leh bawk.

K.Hminga hla, 'Hlobetpari' chu April thlaa Darbu App-a hla play hnem ber a ni bawk a, Sangtei Khuptong nena an sak dun, 'Hmangaihna Kawrawng' chu pahnihna a ni. Rinfeli Khiangte hla, 'Duh Te'n Ka chawi' chu pathumna niin, K.Hminga hla dang pahnih 'Rikrum thila Khiangawihna' leh 'Ka Ngaih, Zawng ho' chu Top 5-ah an lang bawk a ni. Hla play hnem 10 zingah hian K.Hminga album 'Ka Ngaih, Zawng ho'-a hla paruk ngawt an la lang thei a ni.