'Gandhi' series-ah Tom Felton chang dawn

Hansal Mehta web series siam tur, 'Gandhi' tihah British star, Harry Potter film-a Draco Malfoy lema chang, Tom felton a chang ve dawn.

'Gandhi' series hi Ramchandra Guha lehkhabu pahnih, “Gandhi before India” leh “Gandhi: The Years that Changed the World” behchhana siam a ni dawn a, Gandhi lemah hian Prtik Gandhi a chang dawn a, Bhamini Oza chu Gandhi nupui, Kasturba Gandhi lemah a chang ang. Anni bakah Libby Mai, Molly Wright, Ralph Adeniyi, James Murray, Lindon Alexander, Jonno Davies, Simon Lennon te an chang dawn bawk. 'Gandhi' hi international production niin, India leh ram pawn lamah te shoot a ni ang. Tom Felton hi London-a law a zira laia Mahatma Gandhi ṭhianṭha tak, Josiah Oldfield lemah a chang dawn a ni. Felton chuan a role chan tur chu a phur hle tih sawiin, Oldfield chanchin pawh hi uluk taka a zirchian thu a sawi. Kumin kumtir aṭang khan he series hi buaipui ṭan a ni a, tun hnaiah Mehta hian poster pawh a lo tichhuak tawh bawk.