Frusciante hoin RHCP an perform leh ta

12th February, 2020

Red Hot Chili Peppers chu an guitarist John Frusciante hoin Inrinni liam ta khan an perform ho leh ta.

Kum 13 zet stage-a an chet tlat ho tawh loh hnuah Inrinni khan Tony Hawk Foundation event buatsaih Andrew Burkle private memorial concert-ah RHCP hi an inlan a, 1992-a an tihchhuah Give It Away pawh an hla sak zingah hian a tel.

Frusciante hian nikum December thla khan amah thlaktu Josh Klinghoffer chu rawn thlak ve lehin RHCP hi a zawm leh a, fan-te pawh an phur hle. Frusciante hian 1988 khan RHCP hi zawmin 1992 khan a chhuahsan a, 1998 khan zawm lehin 2009 khan a chhuahsan leh a; nikum December khan a rawn come back leh ta a ni.