Khiangte Construction Ṭhazual Lengzem : Youngfella a la ding chang

Khiangte Construction Ṭhazual Lengzem chart tharah Youngfella chuan 'Pasalṭha (OST)' a la dinchanpui zel a, a kar hnihna atan no. 1 a hauh leh.

'Pasalṭha' hi Mizo film thar, 'Dâk Pu' OST niin, he film hi Lersia Play lamah a hit hle a, April thla chhunga Mizo film hralh chhuah hnem ber a ni bawk a ni. Tunlai Lengzem artist zinga huhang ngah ber pawl, Youngfella hian a OST hi a chet ṭhatpui hle bawk a, a YouTube channel-ah dahin thla hnih chhungin view mtd 5.5 a nei tling leh der tawh. He hla hi 'Dâk Pu' OST a ni chungin, love song tawp anga a phuah a nih thu Youngfella chuan a sawi.

Chart tharah hian Asanga Project ft. Ruth Tochhawng 'Thlaler rosepar', Lahmangaihzuali (Nunu-i) 'Mi dawt sawi (OST)' leh Grace 10 : 45 ' A vulmawi si' te pawhin an dinhmun ngai la luahin, Top 4 te hi an la ngai vek a ni. No. 5-ah erawh Kimkima hla thar, ama channa ngei 'Zu Zuar fanu' OST a rawn lang thar thung. Asanga Project ft. Ruth Tochhawng hian an hla thar chu no. 9-ah an lanpui tel bawk.

The Radio 'Hellai lungrun' chu no. 6-ah a rawn lang bawk a, anni bakah Ruth Roluahpuii, Malsawmdawngkimi (Kimdongi) leh HT Lalthanzami-te pawh chart-ah an rawn lang thar bawk a ni.