Khawvel huapin Turkish series a lar chho zel

Kum 2000 chho aṭang khan khawvel ram hrang hrangah Turkey TV series-te a lar chho ṭan a, nikum khan Turkish series-te chu khawvel huapa serial pek chhuah tam lamah pathumna niin, US leh Britain chauh an pha tawh lo a ni.

Kum 2020 leh 2023 inkar khan Turkish series demand hi 184% zetin a pung chho a, an series thawn chhuah hi USD mtd 600 hu zet a tling pha tawh bawk. Turkish series thawn chhuah nasatna chu Spain, Saudi Arabia leh Egypt te an ni a, kum 2023 khan Spain-a series pek chhuah tam ber pathum chu Turkish series an ni.

Culture and Tourism deputy minister, Batuhan Mumcu chuan Turkey series-te hi ram 170 chuanga pek chhuah a ni tih sawiin, US, Russia leh Latin America te pawh an tel a, series entu hi mi maktaduai 750 an tling. An series-te chu khawvel huapa Turkey pho chhuahna pawimawh tak a ni tel tih an hria a, hei vang hian TV industry nen pawh an thawk ho ṭha hle tih a sawi bawk.