Guitar superhero Eddie Van Halen a fam ta

Guitar superhero leh rock legend Van Halen guitarist Eddie Van Halen chu Thawhlehni khan kum 65 mi niin a thi.

January 26, Kum 1955 a ni a, a hma ni lawkin  Soviet Union-a  Presidium of the Supreme Soviet chuan Indopui II-na lai aṭanga inṭan tawh USSR leh Germany kara indona awm chu a tawp tak thu an puan avangin khawvel chuan chulam chu a hawi ṭhup a,  Netherlands ram pawh Germany nena ram inṭhenawm an ni bawk a, an tualchhung titi luahtu ber pawh indo tawp tak thu chu a ni.

Chumi ni, chanchinbu leh radio-a indo tawp tak thu an puan chuai chuai lai tak chuan Netherlands khawpui Amster­dam-a cheng rimawi thiam tak mai Jan van Halen leh a nupui Eugenia-te chuan fapa duhawm tak mai an nei a, chu naute chhartu chu sawi loh, Jan-te nupa ngei pawh chuan chumi nia khawvel eng rawn hmu ta, duat taka Edward Lodewijk Van Halen tia a hming an sak chu rimawi khawvel sawi nghing dawt khawpa mi ropui a la ni dawn tih an ring pha bik lo.

 Eddie kum sarih mi lek a nih chuan Van Halen-te chhungkua chu US lamah pemin  Pasadena, California-ah an inbengbel ta a, Jan Van Halen-te nupa khan an hunkal tawh kha thlir let leh ta se, California lama riah run bel nghet tura an insawn kha an inchhir lo hlein a rinawm. 

Eddie leh a u Alex-te chuan pa chhun tur an nei ṭha bawk a, kum naupangte an nih lai aṭangin piano play an zir nghal a, an man chak nghal hle nghe nghe. Kum naupangte an nih lai aṭangin an unau hian an ṭhian hnaite band an dinpui tawh a ni.

Kum 1972 khan Eddie leh Alex-te chuan kum khuaa band hming chuai tawh lo tur, an chhungkaw hmingchawi band 'Van Halen' chu an din ta a, Los Angeles club lian tak takah play ṭhinin an hming pawh an chher hle. Kum 1977 a rawn inher chhuah meuh chuan Waner Records chuan recording contract an hlui der tawh a ni.

An album hmasa ber 'Van Halen' an tlangzarh chu Billboard pop music chart-ah no. 19 a ni nghal a, US-ah ringawt copy maktaduai 10 chuang hralhin Diamond certification an dawnpui nghal bawk.

Van Halen chungchang hi chu tarlan zui vak ngai loin kan hre ṭhum awm e, 'Jump' leh 'Can't Stop Loving You' tih sawirik tawh chuan rilruah anni bak rawn lang tur dang a awm chuang awm lo e. Eddie Van Halen pawh chu tunge a nih sawizui vak ngai loin an hla la ngaithla lo pawhin a hming chu an hre ṭheuhin a rinawm.

Eddie Van Halen hian artist hrang hrang a thawhpui nual tawh a, chung zigah chuan Kiss bassist Gene Simmons, Nicolette Larson, Michael Jackson, Brian May, Sammy Hagar, Black Sabbath, Roger Waters, Toto guitarist Steve Lukather, leh LL Cool J-te pawh an tel.

Eddie hian lemchan thiam Valerie Bertinelli chu nupuiah neiin fa pakhat Wolfang Van Halen an nei a, ani hi a pa band Van Halen bassist ni ta hi niin, Tremonti bassist-te pawh a lo ni tawh ṭhin. 

Valerie leh Eddie-te hi kum 2007 khan inṭhen felin kum 2009 khan Janie Liszewski nen an innei leh a ni.

Kum 12 mi lek a nih aṭangin Eddie hian zial zuk leh zu in a ching tawh a, ruihhlo pawh a khawih nasa ve ṭhin hle. Mahse kum 2008 aṭang kha chuan heng a ruihhlo tihte hi a sim tawh thung.

Kum 200 khan a lei a cancer tih hriat chhuah niin enkawl a ni a, a lei te pawh chu paih ṭhen hial a ngai a ni. Kum 2002 khan cancer a vei tawh loh thu puan ni mah se kum 2019 khan hrawk cancer vangin damdawi-inah dah luh a ni a, hemi ṭum hian kum nga lai cancer a lo vei leh tawh reng tih puanzar a ni. He natna avang hian Thawhlehni, October 6 khan kum 65 mi niin a thi ta tih a fapa Wolfgang chuan a puangzar ta a ni.

Rimawi khawvelah sulhnu tam tak hnutchhiah mah se Eddie Van Halen chu a kal a hun ta si a, a thih thuin khawvel a deng chhuak rang hle. Mi lar tak takin an ui thu an tarlang nghal chuai chuai a, guitarist lar tak tak pawhin anmahni 'inspire' tu a nih thu an tarlang a ni. A chhungte, amah ngaisangtu, a ṭhian ṭhate leh khawvel chuan:

Guitar finger 'tapping' hi mi ṭhenkhat chuan Eddie Van Halen chin chhuahah an ngai a. Ṭhenkhat erawh chuan Eddia-a'n a uar hma hian Genesis guitarist  Steve Hackett chuan a lo ching tawh ṭhin niin an sawi thung.

Eddie hian kum 1978 khan a instrumental solo 'Eruption' hmangin tapping technique a tilar tih erawh tumahin an sawi buai theiin a rinawm lo a, he guitar solo hi  Guitar World's readers poll "100 Greatest Guitar Solos"-ah No.2 a ni nghe nghe.

Music radar-in a tarlan dan chuan Steve Hackett hian, "Eddie nen hian hemi chungchang hi kan sawi dun ngai lo, mahse, ni e, tapping-ah hi chuan ani hian credit min pe ngei alawm. Eddie hi player ṭha tak a ni a, a technique hming phuahtu chu amah ngei hi a ni e," tiin a sawi.

Tapping chungchangah ringawt pawh hian kan tarlan bak hi guitar lama tuite chuan sawi tur an hre ṭeuh ang. Ṭhenkhat chuan Harvey Mandel aṭanga a hriat ni te pawhin an sawi ve bawk a, Jimmy Page "Heartbreaker" solo aṭanga idea a neih ni te pawhin mi ṭhekhat chuan an sawi ve bawk.

•    Kum 2012 khan  Guitar World magazine reader's poll "The 100 Greatest Guitarists of All Time"-ah No.1 a ni.

•    Michael Jackson hit 'Beat It' guitar solo kha Eddie Van Halen-a perh sak.

•    Guitar tapping technique tilartu ber.

•    An naupan lai chuan Eddie hian drums a vaw hmasa zawk a, a u Alex hian guitar a perh ṭhin. A hnuah an instrument khawih an inthlak.

•    Eddie hian music a chhiar thiam lo tih a sawi a, 'by ear' chauhin a thiam. Chuti chung chuan kum 1964-67 inkar khan Long Beach City College-a buatsaih piano competition-ah pakhatna a ni vek!