Vincy Chhangte Zo rimawi khawvelah a rawn zuang lut leh e

A reh rei tawh dawn lo. A album tihchhuah aṭang pawhin kum hnih vel deuh thaw a ral tawh a, kan hma lawkah khian a album thar kan hmu leh dawn. A album kan hmuh hma hian album tihlar lawkna turin music video kan hmu chho nual dawn a, chung zingah chuan 'La...x10' hi kan hmuh hmasak tur a ni a, he hla hi B.O.G. te nen an sak tur a ni.

'La...x10' bik hi tunah hian shooting an nei mek a, tunkar emaw, kar leh tir lamah emaw hi chuan kan hmuh theih tawh a beiseiawm. Boys of God te hi Gospel an ni a, Vincy Chhangte hla thui hawi lam erawh a Gospel lutuk lo. Hetia an zaiho daih chungchangah Vincy chuan, "Ram leh hnam tana kan thil tih leh thawh ve chhunte min hlutpui avangin BoG hian min puih an duh a, kan thawkho a ni," a ti. "Kan music genre a inan avangte hian Rap music tihhmasawn nan kan thawkho te pawh a ni bawk," tiin a sawi.

"Album ka siam dawn a ni a, kei chu piracy velah hian ka buai lutuk lo. Ka ngaih pawimawh leh ka duh chu ka thu leh hlate hi a zau thei ang berin darh se, miin hria se tih hi a ni," a ti. "Album ka tihchhuah hnuah, kum tawp lamah hian concert tour nei turin ka inruahman," tia sawiin, "Concert ka neihna ṭhina buaithlak tak chu hmun ṭhenkhatah, concert nei tura kan inruahman fel vek tawh hnuah, tlawmngai pawl ṭhenkhatten ka concert tur an phal leh lo ṭhin a, chutiang chu ka tawk zeuh zeuh a, a buaithlak duh khawp mai," a ti. "Khaw pakhatah phei chuan min huphurh deuh a ni ang, an Kohhran Upa inah min thlentir hial," a ti.

Vincy album tihchhuah turah hian hla 12 a awm dawn a, B.O.G. nena an sak hla bakah hian Lil Zo te pawh feature tur zinga mi a ni a, zaithiam dangte pawh a be mek bawk. "Ka hla phuah tam takte hi khawtlang, kohhran leh sorkar inrelbawlna leh kalphung aṭangtea ka phuah a ni hlawm fo. Biak in tam tak an sakna aṭang hian ei rukna suma sak la chhuak leh ta ila, biak in tam tak chu ban nei mang lo tur a tamin ka hria. Khawtlanga tlawmngai duty-ah te hian, veng chhunga pÍm thar, duty-a rawn chhuakte vuak hi a na deuh bikin a lang fo" a ti.

Mizo rapper zinga hlawhtling Vincy Chhangte album-ah hian love song aiin politics kaihhnawih thil a tam leh zawk dawn a. "Hla ka'n phuah a, ka'n ziak ka'n ziak a, a tawpah chuan politics lamah bawk hian a tlu leh ṭhin," a ti. A hla thute a hma ang bawkin a ngaihnawm leh viau ang. Vincy hian album release loh nen pasarih a siam tawh a, tuna a siam leh mek hi pariatna tur a ni.