Rinlawk angin Captain America a turu

May thla chhunga movie chhuak tur zinga beisei sang ber pawl chu Captain America: Civil War a ni a, beisei ang ngeiin a rawn che ngap
ṭha ṭhat ṭhat hle. Kar tawp ni thum chhung lek khan North America box office aṭang chauhin USD mtd 181.8 zet a huilut riap mai.

Captain America: Civil War hian North America box office-ah chancin lian tham a rawn nei nghal a, North America-a movie tihchhuah tawh zawng zawngah, an chhuah ṭan chawlhkar hmasa bera sum huilut hnem ber pangana a rawn ni thei nghal pang. Sum lalut hnem ber chu Star Wars: The Force Awaken kha a ni a, USD mtd 248 zet mai opening week-ah a hlawh chhuak nghal thei a, pahnihna chu Jurassic World niin, USD mtd 208.8 lai a lalut tling a, The Aven≠gers chu pathumna a ni a, USD mtd 207.4 a tling thei a, Avengers: Age of Ultron chu palina niin USD mtd 191.3 a thawk chhuak.

US leh Canada pawn lamah pawh Captain America hi a che ropui hle zel tho. Kar tawp chhung chauha a sum hmuhchhuah zawng zawng hi USD mtd 220 a ni a, China-ah a hit lehzual a, China-ah hian USD mtd 96 lai mai a huilut. US pawnah tihchhuah a ni tawh aṭanga sum a hmuh tawh zawng zawng hi USD mtd 496 a tling tawh. Captain America: Civil War hi ni 12 chhung chhuah a ni tawh a, US bikah kar tawpah khan chhuah ṭan chauh a ni thung. Heng ni 12 chhunga sum a lakluh tawh zawng zawng hi USD mtd 678 zet a tling tawh a ni.

The Jungle Book chu pahnihnaah a la awm a, USD mtd 21.8 zet mai a la lalut thei a, Mother's Day puala tihchhuah, Mother's Day (2016) chu pathumnaah awmin, USD mtd 9.01 a hmu tling.

Box office movie

"Captain America: Civil War" - $181.8 million

"The Jungle Book" - $21.9 million

"Mother's Day (2016)" - $9.01 million

"The Huntsman: Winter's War" - $3.6 million

"Keanu" - $3.1 million

"Barbershop: The Next Cut" - $2.7 million

"Zootopia" - $2.7 million

"The Boss" - $1.7 million

"Ratchet & Clank" - $1.5 million

"Batman v Superman: Dawn of Justice" - $1.05 million