Box Office: Beisei a pha lo chungin no. 1-ah 'The Fall Guy'

North American box office-ah Ryan Gosling leh Emily Blunt-te channa, action comedy 'The Fall Guy' chuan beisei a phak lo chungin no. 1 dinhmun a hauh.

Chart-ah a chung ber dinhmun luah mah se, 'The Fall Guy' hian tlangzarh karah sum a hmuh tura beisei, USD mtd 30-40 a pha lo a, theatre 4,002 aṭangin USD mtd. 28.5 chauh a la lut a ni. Hetih lai hian ram pawn lamah USD mtd. 36.9 la lutin, khawvel pumah a kar khatnaa a sum hmuh hi USD mtd 65.4 a tling thei. Critics review pawh a hmu ṭha a, Rotten Tomatoes-ah 83% fresh rating hmuin, CinemaScore-ah audience aṭangin average grade A- a hmu bawk.

Star Wars Day tia sawi, May the Fourth pualin "Star Wars: Episode I - The Phantom Menace" chu theatre 2,600-ah pek a ni leh a, USD mtd. 8.1 la lutin pahnihnaah a lang. Kar liam taa no. 1 dinhmuh hauhtu, 'Challengers' chuan USD mtd. 7.6 hmuh belhin pathumnaah a tla thla a, ticket sales tlak hniamna hi 49% a tling. Newcomer 'Tarot' chu palinaah langin, USD mtd. 6.5 a la lut a, ram pawn lamah USD mtd. 3.7 la lut bawkin a sum hmuh hi USD mtd. 10.2 a tling tawh. Mahse, he movie siamna atan hian USD mtd. 8 chauh sen a nih avangin a bul ṭanna hi a ṭha viau. "Godzilla x Kong: The New Empire" chuan USD mtd. 4.5 hmuh belh lehin, Top 5-ah a la lang pha bawk a ni.