Khawvelah ChatGPT a ṭhang chak

Kum 2022, November thlaa an launch chauh ni mah se, khawvelah ChatGPT a ṭhang chakin hmang ṭangkaitu an tam hle. An tlangzarh aṭanga ni nga chhung lek hian user maktaduai 1 a nei nghal a, thla hnih hnuah 100 million-ah an pung chho bawk.

ChatGPT hi OpenAI company siam niin, founder-te hi Sam Altman (CEO) leh Elon Musk (co-founder OpenAI) an ni a, an headquarters hi San Francisco, US-ah a awm.

Kumin May 1-ah khawvel huapin ChatGPT monthly user hi mtd. 180.5 an tling tawh a, an zinga 14.4% chu US aṭangin an ni a, India aṭanga hmangtu hi 6.9% an tling bawk. Kumin chhunga a sum lak luh tur hi USD tld. 1 tling tura chhut a ni.

A parent company, OpenAI chuan ChatGPT thuam chakna tur hian hma a la zel a, operate-na atan hian ni khatah USD 700,000 vel zel seng ang a ni. OpenAI hlut zawng hi kuminah USD tld. 86 vel a tling tawh nia chhut a ni.

ChatGPT hi ram 161-ah hman theih a nih laiin ram pasarihah chuan ChatGPT hi an hmang thei lo thung. A hman theih lohna ramte chu - China, Russia, Ukraine, Belarus, Afghanistan, Iran leh Venezuela te an ni.

ChatGPT account siam, mi mtd. 180.5 zingah mtd 100 vel hi active user an ni a, data thar berah chuan an website tlawhtu hi thla tinin mi tld. 1.7 vel an tling. Hei hi nikum February thla aiin 170%-in a pung a ni. ChatGPT traffic 88% chuang hi direct source niin, a awmzia chu an search engine-ah 'ChatGPT' tih type-in an official website-ah hian an lut ṭhin. Chawhrualin visitor hian vawi khat page an tlawhah hian page 5.65 vel an view a, minute 7 leh second 46 hun an hmang ṭhin.

User zingah mipa tam zawkin 55.06% an ni a, hmeichhia 44.94% an ni thung. ChatGPT user zingah 64.53% hi kum 18-34 inkar an ni bawk. Kum 35-44 inkar 17.65%, 45-54 inkar 9.37%, 55-64 inkar 5.34% leh kum 65 chunglam 3.11% an awm bawk a ni.