Drake 'The Heart Part 6'-in dislike 1m a nei

Hip-hop artist pahnih, Drake leh Kendrik Lamar-te inkar boruak a la ṭha lo zel a, an fan-te lam pawh an ṭang thei hle. Drake-a'n Kendrick Lamar a diss-na, 'The Heart Part 6' chuan YouTube lamah dislike-tu maktaduai 1 zet a nei a, heti chung hian Drake leh a fan-te chuan a diss track hi an fak hle thung.

'The Heart Part 6' hi May 5. Pathianni khan a tichhuak a, May 8-ah dislike 1m hi a nei hman. Dislike-tu an tam viau rual hian duhtu pawh a ngah a, ni thum chhung hian view 15m a nei hman der a ni. Social media lamah Drake fan-te pawh an ṭang hle a, Drake-a huat chu 'trend' anga an ngaih mai mai vang titein an sawi a, dislike-tute chu Lamar fan-te nia puhin, pakhat phei chuan 'like leh dislike pawh lei theih vek a ni' a ti.