2024 Eurovision winner Switzerland aiawhtu Nemo

Eurovision 2024 song contest final chu Inrinni liam ta zan khan Malmo, Sweden-ah neih a ni a, Switzerland ram aiawhtu, rapper leh singer Nemo (24) chu drum-and-bass, opera, rap leh rock song, 'The Code' hmangin pakhatna a ni. He hla hi ama chungchang a phuahna a ni.

Croatia ram aiawhtu, kum 28 mi Marko Purisic, Baby Lasagna tia hriat lar chuan 'Rim Tim Tagi Dim' hla hmangin pahnihna dinhmun a hauh a, ani hian public vote a hmu sang ber thung. Palestinian thlawptuten nasa taka an dodal, Israel ram aiawhtu Eden Golan (20) chu pangana a ni bawk. Final-ah pawh hian Golan perform laia lo 'boo' thawmte pawh hriat tur a awm a, mahse amah lawmtute thawm erawh a ring zawk.

68th Eurovision Song Contest final neih zanah hian a hma ang bawkin Malmo kawtthlerah Palestinian thlawptute an pungkhawm leh a, Palestinian flag te an vai bakah, Israel tel tir a nih avanga an lungawi lohnate an lantir leh.

Netherlands artist Noost Kelin chu production crew zinga hmeichhe pakhatin a vau nia sawia a laka complaint thehluh vangin intihsiakna neih hmain disqualify a ni. Final result-ah hian viewer vote-in 50% changin, a dang 50% chu juries mark pek aṭangin lak a ni thung.