A lehkhabu hminga 'Bible' a hman tel vangin Kareena Kapoor Khan-i'n court notice a dawng

Bollyowood star, Kareena Kapoor Khan chuan a naupai lai chanchin a ziahna bu hmingah, 'Kareena Kapoor Khan's Pregnancy Bible' tih a hman chungchangah insawifiah tura hriattirna court aṭangin a dawng.

Kareena lehkhabu hming avang hian advocate Christopher Anthony chuan Madhya Pradesh High Court-ah Khan leh a book seller lakah petition a thehlut a, lehkhabu hralh chhuah khap tur hian a ngen zui bawk. Court chuan 'Bible' tih a hman telna chhan sawifiah tur hian a hriattir a, book seller pawh notice hi pek tel an ni bawk.

Petition thehluttu, Anthony chuan 'Bible hi khawvel puma Kristiante lehkhabu thianghlim a ni a, Kareena Kapoor Khan naupai lai chanchin leh Bible tehkhin chu thil dik lo a ni," tiin he thu hi a lehkhabu tih larna hmanrua atana hmangah a puh. He lehkhabu hi kum 2021-a tihchhuah tawh niin, Anthony hian a hma pawhin Kareena lakah hian FIR a lo thehlut tawh a, mahse police lamin case an siamsak duh loh avangin court lamah a kal leh ta a ni.