'The Voice' coach thar tur Michael Bublé leh Snoop Dogg

American singing reality competition TV series, 'The Voice' season 26-ah superstar coach thar pahnih; Michael Bublé leh Snoop Dogg kan hmu dawn.

NBC chuan New York-a Radio City Music Hall-ah 'The Voice' season thara coach tur hi a puang a, Reba McEntire leh Gwen Stefani-te an zawm ve dawn a ni. McEntire hi he show-a coach a nih ṭum lina tur niin, Stefani hi ṭum riat a nihna tur a ni bawk. Snoop leh Bublé te hi a hmain 'The Voice' ah hian an lo inlan tawh a, Snoop Dogg hi show season 20-naah khan 'mega mentor' anga awmin, Buble hi season 3-ah Blake Shelton-a team adviser a lo ni tawh bawk. Season 26 ṭan hun tur hi puan a la ni lo a, May 13 zan khan Season 25 semi-final tihchhuah a ni.