Zaithiam sum lakluhah Taylor Swift a turu

Adele a hlawhtling kan ti a, mahse sum lakluh hnem lamah chuan Adele hian Taylor Swift a tluk hauh lo mai. '1989' album hit mangkheng a tichhuak a, chu mai bakah '1989' tour ropui lutuk tak mai a nei bawk. Heng aṭang hian Taylor Swift hian sum a lalut hnem tih a hriat reng a, Adele chungah pawh a awm bawk.

Adele album '25' kha hit hle mah se, tour lamah a la che ngap tak tak lo a, hei vang hian Adele hian Taylor Swift a tluk lo a ni. Chu bakah chuan Adele hian endorsement dangah a inhnamhnawih lo a, fashion line leh fakna vela lan a duh lo a, Taylor Swift erawh a lang thung. Mahse heng hi chu chhiar tel a ni lo. Billboard chuan zaithiamte an record hralhna te, streaming aṭanga sum an lakluh te, publishing leh tour aṭang ngawr ngawra an sum hmuhte a chawk chhuak a, chutah chuan Taylor Swift hian sum a lalut hnem ber.

Taylor Swift hian USD mtd 73.5 a lalut a, pahnihna Kenny Chesney ai pawhin a let deuh thawin a sum lakluh hi a tam zawk. Swift hian a album aṭang ngawr ngawrin USD mtd 7.2 a hlep chhuak thei a, a album tilara concert tour a neih zuiah khan USD mtd 61.7 zet a thawk chhuak leh bawk. Hengte bakah a music an tihchhuah aṭanga royalty a dawn zat hi USD mtd 4.1 lai a tling a ni.

Sum lalut hnem pahnihna hi country music lama hriat hlawh Kenny Chesney a ni a, a sum lakluh zawng zawng hi USD myd 39.8 lai ni mah se, Taylor Swift a phak lohna erawh a tam tham hle. A music hralhna aṭang ngawr ngawr chuan USD mtd 1.1 chauh a ni a, mahse tour hlawhtling tak a nei a, tour aṭang hian USD mtd 38.1 zet a hmu tling.

Pathumna hi rock band rawn intuaithar leh The Rolling Stones kha an ni a, USD mtd 39.6 zet an la lalut thei a, Billy Joel chu palina niin, USD mtd 3.7 a lalut a, One Direction chu panganaah an lang pha hram a, USD mtd 24.2 an thawk chhuak. Lang pha hram tih ni mah se, music an chawlhsan lailawk avang leh, music thar an tihchhuah tawh rih loh ngaihtuah chuan heti zat sum an la lalut thei hi a ropui hle.

Sum lalut hnem 10-ah hian Grateful Dead - USD mtd 23.8, Luke Bryan USD mtd 23.1, U2 - USD mtd 21.8, Adele - USD mtd 20.5 leh Maroon 5 - USD mtd 19.2 te an lang.