Pirates of the Caribbean: ON STRANGER TIDES Film senso sang ber a la ni reng

Big budget movie an tih ho zingah rau rau pawh Pirates of the Caribbean: On Stranger Tides hi khawvela movie siam tawh zingah chuan sum sen hautak ber a la ni reng a, a aia senso hautak dang pawh a la awm lawk hmel rih lo.

Pirates of the Caribbean: On Stranger Tides hi kum 2011-a tihchhuah kha a ni a, hetah hian Johnny Depp a chang leh a, Penelope Cruz a chan bakah Johnny Depp chu ngei ngei a ni. He movie hi United Kingdom leh Hawaii velah te an chang a, tuna Pirates thar tur hi chu Australia velah an chang thung.

On Stranger Tides siam hautakna chhan pakhat chu Avatar-a an hman, 3D film technology kha an hmang a, he film siam nan hian USD mtd 410.6 zet sen a ni. Sum senso pawh a sang a, a hlawhtling hle bawk. Khawvel pumah he film hian USD tluklehdingawn 1.046 zet a lalut a ni. Wiki chuan On Stranger Tides siam nan hian, inflation avanga siam ṭhat leh tel loin, USD mtd 378.5 angin a tarlang thung. Mahse an film channa hmun avangte pawhin a danglam leh thei a ni. UK-ah hian movie an chan chuan a hnuah tax rebate (sum pek let) a awm leh ṭhin. USD mtd 378.5 hi sum pek let leh hnua an senso a ni a, pek let tel miah lo hian USD mtd 410.6 a ni.

Sum pek let leh chhiar tel lo a, sumpui aṭanga ṭum khata chhuak zawng zawng aṭanga chhiar chuan Avengers: Age of Ultron khan budget sang ber dawttu a ni. Sum an sen zawng zawng hi USD mtd 330.6 lai mai a ni a, tax rebate paih leh chuan sum sen dik tak chu USD mtd 279.9 a ni. Tax rebate paih leh chuan Pirates of the Caribbean: At World's End, kum 2007-a tih≠chhuah kha senso a sang zawk a, USD mtd 300 an seng. Avengers hian sum dawn let leh hnemna chhan chu England-a an chan vang a ni. Khawvel pumah USD tld 1.403 zet a hmuchhuak.

Kum 2012-a tihchhuah John Carter chu a tira budget hrim hrim anga sum sen hnem pathumna a tling. Sum sen zawng zawng hi USD mtd 306.6 a ni a, tax aṭanga sum an pek let leh paih chuan USD mtd 263.7 a ni. He movie hian USD mtd 284.1 chauh a hlawh chhuak thung a, khawvela movie hlawhchham langsar berte zinga mi a ni. Sum thawh chhuah tarlan hi cinema ticket hralhna aṭang chauh a ni a, DVD leh format chi hrang hrang aṭanga sum an hmuh chhuah chhut tel a ni lo.

Animated movie, kum 2010-a tihchhuah Tangled siam nan khan USD mtd 260 zet sen a ni a, a hlawhtling thaw khat a, khawvel pumah USD mtd 591.8 a thawk chhuak. Kum 2007-a tihchhuah Spider-Man 3 kha sum senso tam pangana a ni a, senso zat chu USD mtd 258 a ni.