Duke and Duchess of Sussex-te'n Royal title an kalsan

Duke and Duchess of Sussex-te hian Britain lal chhungkuaa senior member an nihna an kalsan thu an puang tawh a, Queen Elizabeth II chuan Inrinni khan hemi chungchanga inremna an siam chungchang puangzarin, remruatna thar an siam chu hmanṭan a nih hun aṭang chuan Prince Harry-te nupa hian lal chhungkaw aiawh ṭhinna chu an chhunzawm thei tawh dawn lo tih a sawi.

Inremna an siam hi kumin nipui aṭanga hman ṭan tur a nih thu  Queen Elizabeth II chuan sawiin, Duke and Duchess of Sussex-te hian an HRH title chu an hmang thei tawh dawn lo tihna a ni. Buckingham Palace chuan Sussex-te'n HRH title an hman theih tawh dawn loh thu hi thuchhuah hran an siamah an tarlang zui ve bawk. HRH hi 'His/Her Royal Highness' tih lamtawi a ni a, lal chhungkaw member-te chu an hming an lam dawnin he title hi an telh ṭhin, zahna lantirna a ni. 

Prince Harry-te nupa hian UK lama an chenna hmun Frogmore Cottage thuam ṭhatna atana taxpayer fund $mtd3.12 an hman pawh peklet an tum thu tarlan a ni bawk.

January 8 khan  Harry leh Meghan-te hian thuchhuah siamin lal chhungkuaa 'senior member' nihna an kalsan dawn thu leh UK leh North America-a hun hman kual an duh thu an sawi a, khawvelin a ngaihven nghal hle.

Hemi chungchangah hian Queen Elizabeth II hoin meeting an nei nghal a, hetah hian Prince Harry pa Prince Charles leh a unaupa Prince William-te pawh an tel. Darkar hnih chhung zet Sandringham Estate-ah meeting neiin, Harry leh Meghan-te awmzel dan tur an ngaihtuah a ni. 

Harry-te nupa hian an fapa Archie vantlang mithmuha a langsar lutuk tur an duh loh avang leh zalen zawnga an nun hman an duh avangin lal chhungkaw 'senior member' aṭanga an inhnuhdawh thu hi an sawi a, hemi chungchangah hian mi tam tak chuan Meghan Markle hi an dem hle nghe nghe.

Lalnu Queen Elizabeth II chuan thuchhuah a siamah Harry, Meghan leh Archie-te chu lal chhungkaw member hlu tak an la nih chhunzawm zel dawn tho tih tarlangin, zalen zawka nun an hmanna turah pawh duhsakna a hlan tih an tarlang. An ram tana an hnathawh avangin lawmthu an hrilh bawk.