The Voice-ah Christina Aguilera-i'n Whitney Houston zaipui a tum!

Tunlai khawvelah hi chuan thil harsa a awm tawh lo a ni ber mai. Zaithiam fam chang ta Whitney Houston chu The Voice final-ah Christina Aguilera chuan zaipui a tum niin an sawi.

Aguilera hian hologram hmangin Whitney Houston hi zaipui a tum niin an sawi a, a hla sak tur chu 'I have nothing' tih hla a ni. Hemi chungchang hi amah Aguilera chuan a sawi chhuak chiah lem lo a, mahse ET Online-in an tar chhuak.

Thawhlehni zan khan The Voice top 8 result puan a ni a, Pharrell Williams-a team-a la awm chhun, Hannah Houston chu a tling tih an puan hmasak ber a ni. Aguilera team-a mi Bryan Bautista leh Blake Shelton-a team, Adam Wakefield te pawh chhanhimin an awm. Hemi hnu hian Laith Al-Saadi, Adam Levine-a team-a mi leh, Blake Shelton Team-a mi, Mary Sarah te tlinga puan an ni leh a, Christina team-a mi Alisan Porter, Adam Levine-a naute zinga mi Shalyah Fearing te an tling leh bawk.

A tawpah Blake Shelton-a nau Paxton Ingram leh Christina nau Nick Hagelin te an awm a, hla an sak leh ve ve hnuah result puan a ni a, Paxton hi semi final-a a lut ta zawk a, Nick-a tan intihsiak hun a tawp ve thung.