Billboard 200 : Taylor Swift bawkin hma a la hruai zel

Billboard 200 album chart tharah Taylor Swift chuan a album thar, "The Tortured Poets Department" hmangin hma a la hruai zel a, a zawnin kar thum chhung no. 1 a ni ta.

April 19-a tlangzarh, "The Tortured Poets Department" hian May 9 chawlhkarah US-ah equivalent album unit 282,000 hmuh belh lehin, a hla 31-te chuan on-demand official stream mtd 298.33 an nei leh bawk. Traditional album sales pawh hi 51,000 a la tling a ni. Kum 2020 hnua kar thum chhung a zawna no. 1 a nih lehna hmasa ber niin, kum 2020 khan 'Folklore' chu kar ruk chhung chart chung ber dinhmun a lo luahpui tawh a ni.

No. 2-ah Dua Lipa studio album pathumna, "Radical Optimism" a rawn lang thar a, equivalent album unit 83,000 a nei. Heihi a album zinga chart-a a la thlen sanpui ber a ni. Morgan Wallen "One Thing at a Time" chuan equivalent album unit 71,000 neiin, no. 3-ah a tla thla ve thung. Future and Metro Boomin "We Don't Trust You" pawh no. 4-a tla thlain, SEVENTEEN album thar, "17 Is Right Here" chuan equivalent album unit 53,000 neiin, no. 5-ah an rawn lang.