Cannes Film Festival 2024 Day 1-ah Meryl Streep chawimawi

Khawvela film festival lian ber, Cannes Film Festival 2024 chu May 14 aṭang khan neih ṭan a ni a, May 25 thleng a awh ang.

77th Cannes Festival Day 1-ah hian Hollywood legend, Meryl Streep chu Honorary Palme d'Or chawimawina hlan a ni. Grand Lumiere Theatre-a festival opening ceremony-ah 'Mamma Mia' actress hnenah hian Cannes city gold-plated emblem hi French actress Juliette Binoche chuan a hlan a, guest 2,000 chuang kal khawmte'n standing ovation an pe.

Festival chhung hian Honorary Palme d'Or hi mi pathum hnenah hlan a ni dawn a, Studio Ghibli leh George Lucas te hlan an la ni ve leh dawn bawk a ni.

Kumin festival-ah hian main competition-ah film 22 an awm a, jury member 10 awmin, American actress leh filmmaker Greta Gerwig chu jury president a ni. Festival ṭan ni hian French comedy-film 'The Second Act' chhuah a ni a, Cannes Premier section-ah film screen tur hian film pariat leh, Special Screenings section-a film screen turin film 12 thlan an ni.