Kuwait pawisa a hlu ber

Khawvelin sum hlutna teh nan bera kan hman chu US Dollar hi a ni a, mahse pawisa hlu ber erawh a ni lo. UK pawisa, Pound Sterling hi a hlu viau a, mahse khawvela pawisa hlu ber erawh chu Kuwait pawisa, Kuwaiti Dinar hi a ni.

Gulf ramho khuan kum 1961 thleng khan Gulf Rupee an hmang a, hemi kum aṭang hian Kuwait chuan a hranpain pawisa a nei a, Kuwaiti Dinar tih a ni. Kuwaiti Dinar hi nimina India pawisa nena a inhlut hleih danah chuan Kuwaiti Dinar 1 leh India pawisa, cheng 220.75 zet a intluk.

Gulf ramten Gulf Rupee an bansan chho mawlh mawlh a, kum 1965 aṭang khan Bahrain sorkar chuan pawisa thar tichhuak vein, a hmingah Bahraini Dinar tih a ni a, nimin thleng kha chuan Bahraini Dinar 1 leh India pawisa Rs. 177.31 a intluk. Dinar hi Rom-ho hmanlaia an pawisa hming, Denarius tih aṭanga rawn chhuak a ni. Leihriak (tuialhthei) lamah an hausa hle a, an pawisa pawh a hlu a, a hlu ber dawttu a ni.

Mediteranean tuipuia thliarkar ram, Malta pawisa hi a hlu zek a, an cheng khat leh India pawisa Rs. 177.09 a intluk. Malta pawisa hi Maltese Pound an ti. Pawisa hlu pathumna chu Gulf ram tho, Oman pawisa, Omani Rial hi niin, Rs. 173.26 leh Omani Rial 1 a intluk. Kupra thliarkar tia Bible-a inziak, Cyprus pawisa, Cyprus Pound pawh a hi a hlu hle; Cyprus Pound khat leh Rs. 129.89 a intluk.

Pawisa hlu dang chu Latvia pawisa Lats ( Rs. 108.17), UK Pound Sterling (Rs. 96.24), Jordanian Dinar (Rs. 94.05), Cayman Islands Dollar (Rs. 80.97) leh Euro (Rs. 76.02) te a ni.