Game ngainate tan Mi Max

Xiaomi chuan China-ah phone thar Mi Max a tichhuak thar a, heng phone te hi game khel hrat te tan chuan a ṭha hle ang.

Tablet han tih hluai tur a ni em tih chu a hriat chiah lo nachungin, tablet tia deuh thaw chu a ni e. Mi Max hi chi thuma siam a ni a, India pawisa chuan Rs. 15,300 te, Rs. 17,300 leh Rs. 20,400 man chite a awm a, China-ah chauh an la tihchhuah avangin a man zat hi China pawisa leh India pawisa intluk dan aṭanga dah chhuah a ni.

A hmai a hlai ṭha khawp mai a, inchi 6.44 zet a ni a, Xiaomi chuan game khelh nan an tinzawn deuh hlek tih an sawi. Hei bakah navigation atan a ṭangkai lehzual hle dawn bawk. An kalna tur zawn chhuah nan smartphone hmang ṭhinte tana him leh rintlak zawka thuam a ni tih an sawi. A hmai a hlai a, a battery pawh a ṭha viau a, 4850 mAh a ni.

A man tlawm ber chi hi a RAM-ah 3GB an hmang a, a man to ber hi 4GB a ni thung. GPU-ah chuan Adreno 510 hman a ni a, a hnung lam camera hi 16MP a ni a, dual tone flash-a thuam a ni. A hma lam camera hi 5MP a ni thung. Storage lamah chuan 32 GB aṭangin, a man to dan azirin 128 GB thleng a awm a, memory card slot a awm bawk. Dual SIM a ni a, 4G SIM ve ve pawh a hmang kawp thei.