ACM Awards 2024 : Lainey Wilson leh Chris Stapleton an che ṭha

59th Academy of Country Music (ACM) Awards 2024 chu an ram huna Ningani zan khan Frisco, Texas-a Ford Centre-ah neih a ni a, Lainey Wilson leh Chris Stapleton-te'n award pathum ve ve an la.

Lainey Wilson hian entertainer of the year leh female artist of the year award a lak bakah, Jelly Roll nena an thawh dunna hmangin music event of they year a dawng. Chris Stapleton hian male artist of the year, album of the year leh artist-songwriter of the year award a dawng bawk.

2024 ceremony hi country music icon, ACM award 16 lo la tawh, Reba McEntire-in a host a, a perform nghal bawk. Dick Clark Productions produce a ni. Red Carpet show chu Amber Anderson leh Kelly Sutton te'n an host ve thung.

Award sem zana perform zingah hian Kane Brown, Jelly Roll, Miranda Lammber, Thomas Rhett, Post Malone, Kelsia Ballerini leh Noah Kahan, Nate Smith featuring Avril Lavigne te pawh an tel. Chris Stapleton leh Dua Lipa an duet a, Blake Shelton leh a nupui Gwen Stefani pawhin an hla thar 'Purple Irises' an rawn sa bawk a ni.

ACM Awards hi kum 1966 aṭang khan neih ṭan a ni a, 'hat' trophy hi 1968-ah siam ṭanin, 1972 aṭang khan TV-ah pek chhuah ṭan a ni bawk. Kum 1979-ah show produce tur hian academy chuan Dick Clark Productions hi an thawhpui a, tun thlengin anni hian an la produce chhunzawm zel. Kum 2003-ah 'hat' trophy modern version hmangin, New York City firm Society Awards in a siam.