Sony Music-in Google, Microsoft leh OpenAI hnenah hriattirna thawn

Khawvela music publisher lian ber, Sony Music chuan tech giant - Google, Microsoft leh OpenAI te hnenah hriattirna a thawn a, an artist-te hlate artificial intelligence (AI) system training-tirna an hmang em tih sawi fiah turin a ti.

Sony Music hian an music-te phalna nei loa AI hmanga siam leh sum hmuhna atana siam a khap a, heng tech giant-te bakah hian firm 700 chuang zet hnenah lehkha hi a thawn bawk a ni. Lehkha an thawnnate hian an music-te chu an phalna loin an lo hmang nia an hriat thu an tarlang. Hriattirna an pekte hi insawi fiah turin hun an pe a, hemi chhunga an chhang lo a nih chuan an copyright chu dan ang taka an kenkawh tur thu an sawi bawk.

Firm hrang hrang hnena lehkha an thawnah, Sony Music chuan AI system atana an hla an hman hote, heng hlate hi khawi aṭanga an neih nge tih te, copy eng zat nge an siam tihte sawi fiah turin an ti a ni.