Disney/ESPN, Fox leh Warner Bros. Discovery-te platform hming 'Venu Sports'

Disney/ESPN, Fox leh Warner Bros. Discovery thawkhoin sports streaming service an siam thar tur hming chu thlan fel a ni ta a, Venu ('venue' tia lam tur) Sports tih a ni dawn.

Kumin February thla khan company-te hian an sports programme neihte dah khawm vekna tur platform siam an tum thu hi an lo sawi tawh a, inbuatsaih chho zelin a hming tur pawh hi an thlang fel ta a ni. An thawhho tur thu an puan hnuah, March thla khan Apple tana kum 10 chuang lo thawk tawh, Distad chu CEO atan an chhawr zui bawk. Distad hian Venu Sports logo pawh an tlangzarh nghal a ni. Mahse tih tur hmabak a la tam hle a, hei vang hian Venu Sports launch hun leh a price chungchang pawh an la puang lo a ni.

Venu Sports' CEO Pete Distad chuan an platform hming tur hi puangin, sports fan-te tana a ṭha ber pek chhuah theihna tura hma an lak thu sawiin, technology thar ber berte an hmang tih a sawi. Professional sports league lian zawng zawngte bakah, college sports thlengin fan-ten awlsam zawka an en theihna tura an hmalakna a nih thu an sawi bawk. Engineer 150 chuangin an buaipui mek a, test pawh an nei chho mek a ni. Subscriber-te hian ESPN, Fox leh TNT bakah ESPN+ direct-to-consumer (DTC) platform an en thei dawn a, ESPN leh Fox channel-te cable subscription ngai loa streaming service kaltlanga en theih an nih vawi khatna tur a ni ang.