One In Christ hla thar Parema album hmahruai
Ṭhazual chart-a pakhatna an hauh hnuah One In Christ chuan music video thar an tichhuak leh a, MDM Library-ah dahin, Thawhlehnii zan aṭang khan TV lam chuan an pe chhuak ṭan.
One In Christ music video thar hi 'Min chhung khat leh ṭhin' tih la a ni a, R. lalremruata, Parema tia kan hriatlar hla phuah a ni. He hla hi harsatna leh lung≠ngaihna chi hrang hrangin mihringte min bawhbuai
ṭhin mah se, min ṭanpuitu Pathian a awm hnai reng a, Ani chuan min ṭanpui leh ṭhin tih hla a ni.
He hla a phuah dan Parema chuan sawiin, "Ka haw kawngah hian natna harsatna lungngaihna ten min chim ṭhin a, chauh chang ni hi a tam zawk ṭhin. Mahse hetiang hun ka tawn lai pawh hian min khawngaihtu Lalpa chuan a Thlarau Thianghlimin min awmpuiin chakna thar min pe leh ṭhin hi a ropui ka ti a, Lalpan ka testimony hi hlain min pe ta a ni. A thluk mawi tak min pe tel hian ka lawm a kim," a ti. Parema hi cancer avanga enkawl mek a ni a, May thla chawlhkar hmasa ber thleng khan chemo hmanga enkawl a ni. Hetiang harsatna a tawh karah amah ṭawngṭaipui ṭhintute zawng zawng chungah a lawm hle.
Parema hian a hla phuah hrang hrangte album pakhata siam tumin a ruahman mek a, mi hrang hrang a saktir a, chung zingah chuan One In Christ pawh hi an tel a ni. Album thar tur hi 'Ka vui lo Lalpa' tih a ni a, he album-ah hian Mizo, Hindi leh Sap hlate a awm ang. Mizo hla hi panga a dah ang a, Hindi hla pathum leh Sap hla pahnihte nen hla 10 a awm dawn a ni. A hmain album pathum a lo tichhuak tawh a, pahnih chu Mizo niin, pakhat chu Sap hla a ni thung.
'Ka vui lo Lalpa' album-ah hian zai tur an ṭha a, ngaihthlak chakawm ber te zinga mi chu Vanlalsailovan vai hla a sak tur hi a ni. Vai hla pathum dah a ni dawn a, pakhat chu Pensy-in a sa ang a, Sailova'n pakhat dang leh, Nunui'n pakhat a sa bawk ang. Parema chuan, "Pathian hian Hindi hla pali lai min ve tlat a ni," a ti a, heng a hla zinga pathum chu album-ah hian a dah dawn a ni.
Mizo hla panga awmte hi Bethsy, Fiona, Nunui, TBCA leh One in Christ ten an sa dawn a, Sap hla pa≠hnihte hi Mawitei leh Rinzuali Ralte, a phuahtu Parema fanuten an sa ang.