'Hey Jules' aṭangin 'Hey Jude'

British band hlawhtling leh lar The Beatles hla tam takte zinga hriat hlawh ber pawl, mi tam takin an ngaihthlak nin theih loh chu 'Hey Jude' hi a ni.

He hla hi kum 1968 August 26 khan US-ah an tlangzarh a, August 30 khan Britain-ah an tlangzarh leh bawk. A hlawhtling chho rem rem hle mai a, UK single chart-ah pakhatna a rawn ni nghal a, US Billboard chart-ah pawh pakhatna a hauh chiang hle. Ram danga an tihchhuahnaah pawh pakhatna dinhmun hi a awmna tur emaw tih mai tur a ni.

'Hey Jude' hla hi a tirah tak chuan 'Hey Jules' tih a ni a, a hnuah a thu lam a nawm zawk vang leh, ṭha zawka a hriat avangin he hla phuahtu, tuna 'Sir' ni ta, Paul McCartney hian 'Hey Jude' tiin a thlak leh ta a ni. 'Hey Jude' hla hi McCartney hian John Lennon-a fapa tana a phuah a ni a, a nu leh pa inṭhennain a nun a nghawng nat lutuk loh nan te, a thlamuan nan te, a beidawn lutuk loh nantea a phuah a ni.

John Lennon-a nupui, tun thlenga khawvelin a hriatlar chu Japanese mi, Yoko Ono hi a ni. Kum 1968 May thla thleng kha chuan John Lennon-a nupui chu Cynthia Lennon a ni a, hemi kum May hla hian Cynthia leh Lennon te hi an inṭhen a, an inṭhen chhan chu Yoko Ono hi a ni. Cynthia hi The Beatles te nen hian an inzawmna a ṭha ṭhin hle a, an band a lar hma, kum 1963 aṭang tawh khan an inlo zawm ṭha viau tawh a, an band social circle chhunga mi niin, an inngaina tlang hle. John Lennon leh Cynthia an inṭhen pawh hian an band eng emaw ti takin a nghawng ve hle a, a bik takin McCartney hi a nghawng zual niin alang.

Lennon te inṭhen kum June thlaah McCartney chuan Cynthia leh a fapa Julian, Kenwood-a awmte tlawh a duh thut mai a, kalkawngah chuan John-a nupui
ṭhen leh a fapa, Julian te dinhmun tur a ngaihtuahin a khawngaih hle a, a bik takin Julian tan phei chuan a hrehawm lehzual dawn hle hian a hria a; a rilruah Cynthia te nufa chungchang ngawt chu a lut a, 'Hey Jude' hla hi a phuah ta a ni.

Cynthia nena John-a fapa Julian tana a phuah a ni tih McCartney hian a sawi rualin, ṭhenkhat chuan McCartney hian inhualna pawh a lo neihpui tawh, kum 1968 June thlaa a ṭhen leh tak chungchang pawh a zep tel ngei niin an hria. Hetihlai hian John Lennon chuan he hla hi ama pual liau liaua a phuah niin a ngai thung a, a ngaihbel lai chu 'You were made to go out and get her' tih lai hi a ni.

'Hey Jude' hla hi The Beatles-in label an neih, Apple Records hnuaia an hla tihchhuah hmasak ber a ni a, London-a an record niin, orchestra piece 36 zet an telh bawk. Ram 12 zetah pakhatna a hauh a, kum 1968 kum chhung khan copy maktaduai 5 zet an hralh. US-a an hralh zawng zawng zat hi makta≠duai 10 zet a ni a, The Beatles-in US-a an hla hralh hnem ber palina a tling pha a ni.