Feli Fanai 'Chhingmittui a hul zo ta'

Feli Fanai chuan zanin hian a music video thar 'Chhingmittui a hul zo ta' a tichhuak dawn.

Instagram lama Feli Fanai follower-te chuan an hre tawhin a rinawm. Kar hnih liam ta velah khan IG-ah Feli hian a music video thar tur teaser a tichhuak a, comment-tu lam aṭang pawhin thlira ngaithla chak tawh an tam tih a hriat theih. A follower-te mit leh beng tivir tur tawk lekin a story lamah an shooting neih lai vel tawi te te a chhawp chhuak zeuh zeuh bawk nen, en chak tawh an tam hle ang. Chu music video chu zanin hian Zonet lamah en theihin tihchhuah a ni dawn ta.

Feli hla thar tihchhuah tur 'Chhingmittui a hul zo ta' hi hre tawh kan awm furin a rinawm. Tunhma deuh khan Lyni Lalthanzuali'n thiam takin a lo sa tawh ṭhin a, chumi vang chuan a hla kalhmang sawi belh vak a ngai tawh lo. Feli hian a rawn thar thawh leh dawn a ni. 

He hla hi satu hmasa Lyni nuṭa C. Lallawmzuala (Malawma) phuah a ni a, music chu Lal K Sailo kut chhuak a ni dawn a, recording chu HC Recording-a a tih niin video chu BS Pictures kut chhuak a ni thung. 

Feli Fanai hian music video a tichhuak lo rei deuh tawh a, tun ṭuma music video thar a tichhuak tur pawh hi a nghahhlehawm viau. Teaser aṭangin a 'hot' dawn tih an chiang a, TV lama thlira ngaithla hman lote tan pawh ni sarih hnu velah chuan YouTube lamah en turin a awm tawh dawn a ni.