Hmingtea leh Helly Zathangte'n hla thar tichhuak dawn

Mizo Idol star Hmingtea Chhangte leh Helly Zathangte thawkdun chuan hla thar 'Hmangaihtu Dik' tih an tichhuak dawn.

'Hmangaihtu Dik'hi  Hmingtea phuah a ni a, recording chu Johns Studio, Siahaah lockdown kara an tih niin video chu Alberta Ralte kut chhuak a ni dawn thung.

"He hla hi Pathianin mihringte inkara hmangaih­na a siam hi a siamtu Pathian rawn hmasa loin kan duhthuin kan nei a, mahse a tawpah rilru na takin kan awm leh ṭhin a. Chuvangin hmangaihna neitu Hmangaih Pathian hnenah kan dil phawt chuan kan tan ui reng reng a nei lo a ni tih tarlanna a ni," tiin Hmingtea chuan a hla thar tur chungchang Vanglaini a hrilh.

Music video-ah hian kan hmelhriat sa, Miss Mizoram 2018 second runner up Malsawmsangi hmel kan hmu dawn a, Hmingtea chuan,"Ka tlangval laia ka music video hnuhnung ber tur pawh a ni tawh mai thei tih bak ka sawi lo ang," tiin a sawi fiam a, mahse hei hi a fiamthu mai mai a ni lo mai thei. Chanchin lawmawm lam kan hre dawn hnai pawh a ni mahna!

Hmingtea chuan an hla thar tihchhuah tur chuan ṭhalaite'n ngaihzawng an zawnna kawngah Pathian rawn hmasak pawimawhzia hre chhuak se a duh hle a ni.

Helly Zathang hi Siaha lam mi niin Lai hla sa ṭhin a ni a,  'Hmangaihtu Dik' hi Duhlian ṭawng hmang music video-a a inlanna hmasa ber tur  a ni.