Britain-a kum 30 hnuai lam hausa zingah Adele leh Rooney an lang

Britain chhunga kum 30 hnuai lam hausa, The Sunday Times-in mi 10 a tarlan zingah zaithiam Adele, footballer Rooney leh actor Daniel Radcliffe te an lang a, mahse a hausa ber ber panga zingah erawh an lang pha lo.

Britain chhunga kum 30 hnuai lam hausa ber chu Fashion lama hlawhtling, Tom Persson, kum 30 mi a ni a, a hausakna hi £mtd 672 a ni. (US Dollar 1.44 leh British Pound Sterling 1 a intluk). Tom Persson hi British mi dik tak erawh a ni lo a, Swedish mi, Britain-a awm mek a ni. Ealing-a Met Film School-a zir chhuak a ni a, a in neih zinga ropui ber chu Wiltshire-a mi niin, Mizo pa teha ṭÓn 780 zeta zau a ni.

Hausak lama pahnihna chu Fawn leh India Rose James te unau hi an ni a, kum 30 leh kum 24 mi an ni. An hausakna hi £mtd 482 zet niin, an pu hnen aṭanga an rochun a ni. Nikum khan Rose hian artist kutchhuak ropui tak tak dah khawmna tur hmun, Soho Revue chu a hawng. Tuna Rose bialpa hi Yarborough earl pariatna fapa, William Pelham a ni.

Electric bungraw lama hriat hlawh, Thomas Mackie te chhung≠kua hi hausak lamah chuan pathumnaah an lang pha a, an hausakna hi £mtd 380 hu zet a ni. Thomas Mackie hi kum 28 mi a ni a, electric bungrua, wholesale-a pechhuaktu, CEF Holdings dintu tupa a ni. Kum 2014-15 chhunga an sumdawnna aṭanga thil an hralh chhuah zawng zawng man zat hi £mtd 504.2 zet a tling.

Property leh sakawr intlansiak lam enkawltu lian, Tim leh Pollyana Gredley te chhungkua hi palina niin, £mtd 194 zet an nei. Bill Gredley hi property developer a ni a, sakawr intlansiak neitu a ni ṭhin a, amah hi kum 83 mi zet a ni tawh a, a fate hian an enkawl zui ta a ni.

Kum 30 hnuai lam hausa zinga pangana, Pete Cashmore hi thlahtute sumdawnna leh hausakna zar zo lo, mahni thawh chhuah liau liaua hausa, hausa top 30 zinga lang awm chhun a ni. A hlawhtlinna chu internet a ni. Kum 19 mi lek a nih laiin ama pindan chhung aṭangin Mashable website a siam a, kum 2014 kha chuan khawvela website tlawhtu ngah leh hlawk pawl a ni tawh a ni. A hausakna hi £mtd 170 a ni.

Wayne leh Coleen Rooney te hi paruknaah an lang a, an pahniha sum neih hi £mtd 96 zet a tling a, Adele chu pasarihna niin, £mtd 85 neia chhut a ni. Harry Potter changtu Daniel Radcliffe chu pariat≠na a ni a, £mtd 74 neia ngaih a ni a, pakuanaah £mtd 70 neia ngaih, Chris Phillips chu langin, Twilight changtupa Robert Pattinson chu 10-naah a lang a, a sum ngah lam hi £mtd 65 a ni.