Science & Environment: Elon Musk Space X-in Pentagon aṭangin contract hmu

Elon Musk-a com­pany hmingthang tak Space X chuan Pentagon aṭangin contract a hmu a, Pentagon chuan $mak­taduai 149 (Rs vbc 1,090 vel) hu vel contract pein hemi hmang hian missile- tracking satellite a siam sak dawn tih US Space Development Agen­cy (SDA) chuan kar tirah khan a puang.

Pentagon contract a ziahpui hi Space-X in satellite siam tura sorkar a thawhpui vawi khatna tur a ni.

Rocket hman nawn theih leh astronaut cap­sule siam vanga hmingthang tak Space X hian Starlink atan satellite siam lam a hawi ta a, Internet-beaming satellite tam tham tak an siam tur hmang hian chief executive Elon Musk chuan SpaceX-in interplanetary goal a neihte chu tipuitling turin pawisa tam zawk a thawh chhuah theih a beisei.

SDA contract hnuaiah hian Space X chuan Redmond, Washington-a  a Starlink assembly plant chu satellite pali, wide-angle infrared missile-tracking sensor nei siamna atan a hmang dawn niin SDA chuan an sawi.

Satellite dang pali siamna tur hian Techno­logy company L3 Harris Technologies, Harris Corporation tia hriat ṭhin pawhin $mtd 193 a dawng bawk a, Space X nen hian kum 2022 chawhnu lamah chuan satellite hi an kahchhuah hman beisei a ni.