Here Be Lions Ft. Darlene Zschech

Worship Team Here Be Lions leh Hillsong aṭanga Mizo-te pawhin an hriat lar Darlene Zschech-te chuan hla thar 'I Speak Jesus' an tichhuak.

'I Speak Jesus' hi YouTube lamah a music video en theih turin an dah chhuak tawh a, Here Be Lion member Dustin Smith chuan American gospel artist Jesse Reeves-a'n an tana a ṭawngṭaisak aṭanga an phuah chhuah a nih thu leh ṭawngṭaina hla a nih thu a sawi. "Kan inkhawmna, kan chhungkua, kan dam lohna, kan rilru hah leh rilru hrehawmna zawng zawng chungah Isua hming sawi hi ka duh a ni. Thumal thil tithei tak 'Isua' tih kan nei tawh a, chuvang chuan a thluk chiah kha kan mamawh tawh a ni. Isua hmingah hian thiltihtheihna ropui tak a awm a ni," tiin an hla thar chungchang a sawi a ni. 

Grammy award leh Dove award tam tak la tawhtu Matt Redman chuan January 31 hian album thar 'Let There Be Wonder' a tlangzarh dawn tih a sawi.

'Let There Be Wonder' hi Matt Redman-a music project 14-na tur a ni dawn a, Integrity music a thawhpui hnua a album hmasa ber tur a ni ang. Zirtawpni khan he album-a hla pakhat 'We Praise You' live video a tlangzarh tawh bawk a ni. Let There Be Wonder'-ah hian hla 12 a awm dawn tih a chiang tawh bawk. Matt Redman hian studio album 13 a tihchhuah tawh bakah live album pathum a tichhuak tawh a, Compilation album pahnih a tichhuak tawh bawk a ni.