Khiangte Construction : Ṭhazual Lengzemah 'Thlaler rosepar' a vul

Khiangte Construction Ṭhazual Lengzem chart tharah Asanga Project ft. Ruth Tochhawng te 'Thlaler rosepar' a vul mawi ber.

'Thlaler rosepar' hi chart-ah hun eng emaw chen an lo lanpui tawh a, hma rawn sawn zelin rin lawk angin a chung ber dinhmun an rawn luahpui ta a ni. He hla hi Asanga phuah a ni a, recording hi Westend Studio-ah tiin, music hi Asanga leh Tluangtea Hnamte (Westend Studio) te siam niin, music video hi Osiama videography siam a ni bawk. March 23-ah YouTube-ah an dah chhuak a, a hla thu a ṭhain a thluk a mawi a, Ruth-i aw mawi tak nen a inrem bawk si, ngaihthlak a nuamin a feel vawng vawng theih. Duhtu an tam bawk aniang, view pawh 1.6 million a nei tling der tawh. An thawh dunna vek, 'Min en teh' tih chu no. 7-ah an lanpui thei bawk a ni.

The Radio hla, 'Hellai Lungrun' chu no. 2-ah a rawn invawrh chho bawk a, ngaihthlak a nuam lehpek hle. Hla mawi dangdai tak tak an la rawn chhawpchhuah zel beisei ang. 'Hellai Lungrun' hi Phillip Lalremruata phuah a ni. No. 3-ah Kimkima hla, Zu Zuar Fanu OST a la lang a, Mendal chuan a hla thar, Youngfella nena an phuah, 'Pialral' chu no. 4-ah a rawn lanpui a; social media lama boruak nei lian tak, Siamsiami Pachuau 'Ka Nail Polish' chu no. 5-ah a rawn lang thar bawk.

Ṭhazual Lengzem Top 10-ah hian Grace 10:45, Kimdongi leh HT Lalthanzami-te pawh an la cham chhunzawm a, anni bakah Zothana a rawn lang thar bawk a ni.