Lalbiakzama, MPS (Retd.) ziah 'Kât leh Daifim' movie tichhuak dawn

Lalbiakzama MPS (Retd.) ziah leh direct, 'Kât leh Daifim' movie chu karleh Zirtawpni, May 31 zan hian tihchhuah a ni dawn. Zonet Empai App-ah pek chhuah a ni dawn a, he app hi Playstore leh Appstore-ah download theih a ni.

Fahrah unau pahnih, anmahni enkawltu an puin a thihsan hnua an unauin nun kawng chhuk chho, harsa taka an paltlang dan te, hma lam beisei dan inpersan tak avanga an hmathlir dang chho leh, an kawng zawh inang lo tak avanga dinhmun inep taka an awm dante 'Kât leh Daifim' film-ah hian kan hmu dawn.

Bza hi film siam lama tui tak a ni a,1980's vel aṭang khan film puitling siam tumin hma pawh a lo la tawh ṭhin. Mahse shooting an neih laiin eizawnna avangin a chhunzawm thei lo a, a eizawnna aṭanga a pension hlim aṭangin film siam lamah a bur leh nghal chat a ni. Hmun hrang hrangah Police Officer niin a awm kual a, a hna aṭanga a tawnhriat chi hrang hrang la khawmin thawnthu ṭha tak tak a ziak a, he movie pawh hi thil thleng tak tak behchhana siam 'Inspired by true events' kan tih ang chi kha a ni. Nikum June thla tawp aṭangin shooting hi an ṭan a, kum khat dawn an buapui hnuah en theihin a rawn chhawpchhuak dawn ta a ni.

'Kât leh Daifim'-ah hian Jeremy Lalngilneia chu Director of Photography niin a video pawh a edit nghal bawk. Jeremy hian film siam lamah pawh sulhnu ṭha tak a lo nei tawh a, Dinthar Kohhran leh KṬP film siam, Nun Krista (2011) leh Lal Isua Nen (2013) tiha a thla latu kha a ni a, kum 2022 kum tawpa release 'The Lottery'-ah khan Director a lo ni tawh bawk.