Box Office champion thar 'IF'

North American box office-ah director John Karsinksi live-action animated fantasy comedy film, 'IF' chu champion thar a rawn ni a, a chung ber dinhmun luah turin 'Kingdom Of The Planet Of The Apes' a rawn paihthla.

Ryan Reynolds channa, 'IF' hian beisei erawh a pha chiah lo a, tlangzarh karah USD mtd 40 tal la lut tura chhut a nih laiin, USD mtd 35 a la lut a ni. Ram pawn lamah USD mtd 20 a la lut bawk a, hetih lai hian a siamna senso atan hian USD mtd 110 vel zet sen a ni thung.

Critics lam aṭangin review a hmu ṭha lutuk lo a, Rotten Tomatoes-ah rating 49% pek a ni a, mahse viewers lamin an lawm thung a, Cinemascore-ah A scale an pe a ni.

'Kingdom of the Planet of the Apes' chuan thawm nei lian viau mah se kar khat chiah No 1-ah a awm. Sci-fi dystopian action film hian a kar hnihnaah USD mtd 26 hmuh belh lehin, domestic-ah USD mtd 100 leh international market-ah USD mtd 136 a la lut tawh. Newcomer dang, Lionsgate horror film, 'The Strangers : Chapter 1' chu No 3-ah a rawn lang bawk a, theatre 1,856-ah chhuahin USD mtd 12 a la lut. 'The Fall Guy' chu NO 4-ah thla thlain, USD mtd 8.4 a lak luh belh a, 'Challengers' chuan USD 2.9 la lutin Top 5 a khar. Amy Winehouse biopic 'Back to Black' chu No 6-ah a rawn lang ve bawk.

Kar liam taa box office lam thawm hi a na lo hle a, nikum a hun lai nena khaikhinin sum hmuh zat hi 22% in a hniam zawk a ni.