Dodalna karah jennifer lopez a zai

Qatar Airways chuan an thlawhtheihna service huam chhung a zauh zel a, Atlanta khawpui pawh an thleng ta. Hemi lawm nan hian Thawhlehni khan Fox Theatre, Atlanta-ah hun an hmang a, Jennifer Lopez pawh a zai. Mahse hemi hma hian J.Lo hian zai lo tura ngenna lehkha a dawng a, hei bakah a zai lai hian a kawtah Qatar sorkar thil tih dan duh lohna an lantir.

Association of Flight Attendants chuan Jennifer Lopez hnenah hian zai lo tura hriattirna lehkha an pek bakah, Fox Theatre kawtah dodalna an lantir a ni. J.Lo. hnenah hian Qatar sorkar chu human trafficking leh sal neih leh chhawr kawnga khawvela ram tlaktlai lo berte zinga mi a ni tih an hriattir a, chuvang chuan Qatar Airways-in an thlawhtheihna service zau belh zel lawmna huna zai lo tur hian an hriattir a ni.

He lehkhaah hian Qatar ram chuan an rama hnathawktu hmakhua ngaia beitu tur pawl, labour union din a khap thute tarlangin, ram dang aṭanga Qatar-a hnathawk tura lut dinhmun chu sal dinhmun nen an khaikhin a ni. An ram dan ṭhenkhatte sawisel bawkin, anpui kawp te, uire te hrem theih a ni chu an duh loh thu an tarlang.