Dr Malsawma phuah Pian champhaphâk lawmna MV tichhuak

Dr Malsawma, Chaltlangin pian champhaphâk lawmna hla a phuah, 'Ka lawmpui che' tih Ramhlun South Branch YMA Zaipawlin an sak chu Nilaini, May 22 zan khan a music video tihchhuah a ni a, Ramhlun South Branch YMA YouTube channel-ah dah a ni.

Dr Malsawma chuan he hla a phuah chhan tihian Vanglaini a hrilh a, "Kan ramah mihring huna hunpui pawimawh, kumtina khel loa lo her chhuak ṭhin‘PIAN CHAMPHAPHÂK’ kan lawmin a pual hla kan neih tam loh vang em ni(?), a lawmtu apiangin khawpui leh thingtlangah, a pui a nawi, a tar a zurin a hla awmzia hre chiang mang lo leh thiam rual lo chunga sap hla 'Happy birthday to you' kan ti ṭhup thup vek mai hi tlawmngaihah lain, leh 'birthday' tih aia kan ṭawng dik 'Pian champhaphak' ngei hmang tlat ṭhin Mizoram Upa Pawl duhdan hre rengin Mizo ṭawng ngeia pian champhaphâk lawma hla neih duhna lian tak hian min tur ve tlat mai a ni,' tiin, kum 70 a tlin kum, March 10, 2022 khan he hla hi a thu leh a thluk a peih fel thu a sawi.

Hun eng emaw chen an buaipui hnuah Ramhlun South Branch YMA Zaipawl hian a hla phuah hi sain, music video an tichhuak thei ta a, an chungah a lawm hle tih Dr Malsawma chuan a sawi. He hla hi Mizo ṭawng hmangtu zawng zawngten pian champhaphâk kan lawmna apiangah hlim takin sa ṭhin ila tih chu a beisei leh duhthusam a nih thu a sawi bawk.