Mizoram Suzuki Gixxer Day hmang

Suzuki Motorcycle India Private Limited (SMIPL) chuan nimin khan Mizorama an chet ṭhat avangin Brigade Field, Bawngkawn, Aizawlah ropui takin Mizoram Gixxer Day an buatsaih.

Gixxer Day hi SMIPL Division Manager Miyaji San chuan hawngin, Mizoram Gixxer Club T-shirt a tlangzarh. Mizo mipuiin Gixxer bakah Suzuki siam lirthei ke hnih nei an ngaihhlut avangin lawmthu a sawi.

Japanese Miyaji San nen company lam aṭangin mi pangain Gixxer Day hi an hmanpui a, kum 10 chhung Gixxer bike nei tawhte thilpek hlanin, 2017-a din Mizoram Gixxer Club-in mumal taka ke a pen avangin an ngaihhlut thu an sawi.

Nimina hun hmannaah hian a duh apiang tel theihna tur inelna chi hrang hrang, bike stunt show, cosplay leh concert an huaihawt.

Kum 2014 khan LBS Suzuki hian Mizoramah Suzuki two-wheeler dealership a hawng a, kum 10-na hmang mekin India rama dealer 500 chuang zingah nikum December khan hralh tam ber an ni a, tun thla kal mekah hralh hnem ber an ni mek bawk. 2023 chhungin an hnuaia sub-dealer-te hralh tel loin thla tin chawhrualin 850 vel an hralh.

LBS Suzuki Managing Director, H Ngurdingliana Ngurte chuan Mizo mipui vanga hetiang dinhmun thleng thei an nih thu sawiin, mipui vantlang tana malsawmna ni ve tura pen chhuah chu an bat a nih angin hun lo kal zelah nasa zawka ke pen an duh tih a sawi.